Deanuleagis Ohcejoga ja Deanu gielddat leat juo measta 10 jagi bargan virggálaččat ovttas mánáidgárde- ja skuvladoaimmas. OVTTAS!-prošeavttas Ohcejohnjálmmi vuolleskuvlla sámeluohkáid ja Sirpmá sámeskuvlla oahppit ja oahpaheaddjit deaivvadit guktii vahkus oktasaš oahpahusa olis. Gielddain lea maiddái ovttasbargosoahpamuš mánáidgárdebálvalusaid geavaheamis Ohcejohnjálmmi mánáidgárddis ja Deanušalddis.
OVTTAS!-prošeavtta oamasteaddjit leat diŋgon Sámi allaskuvllas čielggadeami, man váldoulbmilin lea čohkket dieđuid oahpaheddjiid, vánhemiid, ohppiid ja mánáidgárdebargiid oainnuin ja vásáhusain dán ovttasbarggus.