Forprosjektet skal gjennomføre ei kartlegging med fokus på organisering, ansvarstilhøve, rolleforventningar, kultur og haldningar og ressursfordeling innan fag- og yrkesopplæringa. Spørsmål ein mellom anna ønskjer å få innsyn i, er korleis organiseringa av fag- og yrkesopplæringa påverkar forholdet mellom trongen for arbeidskraft i arbeidslivet og kva høve ungdom har til å fullføre ei yrkesopplæring med fag- eller sveinebrev.
I forlenginga av den gjennomgangen som er omtalt her, ønskes konkrete framlegg til korleis ein kan utvikle eit pilotprosjekt knytt til to vidaregåande skular, der ein skule er lokalisert i Bergen. Ein slik pilot må ta utgangspunkt i kartlegginga, samt at det må leggjast fram nye måtar å organisere feltet på. Ein særs viktig del av dette er korleis ein kan få modellar som gjer at skule og arbeidsliv vert bunde tettare saman. Dette veit vi ikkje fungerer i dag. I 2015 var det 9000 søkjarar som ikkje greidde å skaffe seg læreplass. Fagopplæringa er tufta på trepartssamarbeidet, der grad av forplikting frå partane kanskje er det som i størst grad påverkar resultatet av opplæringa.