Optimalisering av brachyterapiplanar,kor mykje kan vi vinna på invers optimalisering? Eksempel frå cervixcancer.

Kor mykje vinn ein på invers doseplanlegging ved brachyterapi samanlikna med manuell optimalisering? Eksempel frå behandling av cervixcancer: Vår praksis var å optimalisera planane manuelt ved å "dra" i isodosane frå startverdiar til vi best mogeleg fekk oppfylt krava til dosedekking samstundes som dose til risikoorgana var under grenseverdiar. Vi har sett på 18 pasientar som kvar har fått 4 individuelt planlagte brachyterapifraksjonar basert på MR innteikning og manuell opti-malisering av planane. Bestrålinga var gitt med Fletcher applikator utan bruk av ekstra nåler. Manuell optimalisering gav ein midlare minimumsdose til målvoluma på 78.3% av foreskreve dose. Retrospektiv reberekning med algoritmen Inverse Planning Simulated Annealing (IPSA) med og utan ekstra restriksjonar på maksimumdose til målvolum samt med ulike restriksjonsgrenser til risikoorgan gav midlare minimumsdose til målvolumet på mellom 82.5 – 91.7%. Best resultat var for IPSAplanar med krav til maksimumdosar til målvolumet. Dosimetrisk evaluering av manuelle og invers optimaliserte planar indikerer potensialet av IPSA for brachyterapi av cervixcancer. (Acta Oncologica 2014;53:1012-1018). Ei liknande tilnærming vart gjort ved brachyterapi med ringapplikator på denne pasientgruppa. Seks manuelt optimaliserte doseplanar vart reberekna med HIPO (Hybrid Inverse Treatment Planning) optimalisering. Også her var det dosekrav til maksdose i målvolumet. Midlare dosedekking auka frå 84% til 89.2% ved HIPO optimaliseringa. Individuell auke varierte mellom 0 og 11.1%. Dette var korrelert til dosar til risikoorgan under grenseverdiane for alle pasientane. Vi får generelt ikkje full dosedekking til målvolumet og samstundes akseptable dosar til risikoorgana med gjeldande intracavitære brachyterapi for cervixcancer utan bruk av ekstra kjelder i applikatornåler. Våre data indikerer at bruk av invers doseberekning vil betra dosefordelinga samanlikna med manuell optimalisering når nåler ikkje er brukt. Slik forbetra dosefordeling kan ventast også ved annan type brachyterapi med tilsvarande komplekse krav til dosedekking.